नाते तुझे नि माझे नाही खरोखरीचे

नाते तुझे नि माझे नाही खरोखरीचे
धर्माचे कर्म वेडे मानू बरोबरीचे.

येणे ही एकट्याचे जाणे ही एकट्याचे
गीतेत ज्ञान आहे सावळ्या श्रीहरीचे

येथे कुणी न बंधू सखा कुणी ना आता
नात्यात वैर झाले सार्‍या घरोघरीचे.

माझ्या तुझ्यात आता पडली कशास छाया?
कि, अंतर सांगते ती आता दरी दरीचे.

ओळख काय सांगू कसली तुला कुणाची,
काहीच नाव नसते स्वप्नातल्या परीचे.

कसा सोडवू गुंता माझ्या तुझ्या मनाचा?
झाले किती प्रयत्न माझ्या परोपरीचे.

विसरून दु:ख थोडे गझलेत या रमावे
घ्यावे भरुन प्याले माझ्या सुधाकरीचे.